لو عندكم مشكلة في الدولار كلمو الكاردينال

في العام 2009 اطلق الأخ الحبيب صلاح ادريس قنبلة من العيار الثقيل وأوضح انه دعم المريخ بالطوب والسيخ لتشييد ملعبه الحالي لقومية يمتاز بها الرجل ولعلاقة تربطه برئيس المريخ الاح الحبيب جمال الوالي .. وقتها اثارت تصريحات الأخ صلاح جدلا كثيفا في الاواسط الرياضة وظلت تصريحات الرجل متداولة لوقت طويل .. وبالامس كرر الأخ اشرف سيد احمد الكاردينال زات التصريحات التي ادلى بها الارباب مؤكدا انه دعم المريخ قبل ان يتبوأ رئاسة السيد الهلال لدواع قومية يتصف بها كل اهل الهلال .. كيف لا والقومية والهلال وجهان لعملة واحدة واذا نسيتم لابد من التذكير اليس الهلال هو من ناهض الاستعمار … اليس الهلال هو من أسس مؤتمر الخريجين الأوائل … عليه فالطبيعي ان يمتاز كل اهل الهلال بالقومية ويسعون لدعم كافة الأندية الضعيفة التي تحتاج الي مساعدة من باب ان الهلال هو الرائد وبالتالي لا بد ان يتقدم الصفوف داعما للاندية الأقل نموا !

ولم يقف الأخ اشرف الكاردينال عند دعمه السابق بل اعلن جاهزيته لدعم المريخ ان أراد حتي ان كان ذلك عبر طريقة (سرية) لانه يدرك تماما ان اهل المريخ رغم حوجتهم الا انهم مكابرون ولا يقبلون الدعم ظانين انهم والسيد الهلال في كفة واحدة !
سيعتبر اهل المريخ حديث الأخ اشرف علي انه استفزاز رغم ان الرجل كان جادا فيما قاله وهو الان جاهز للدعم … شوفو الناقص ليكم شنو وكلموهو والراجل ما بقصر معاكم وزي ما قال ليكم خلوها سرية لدواع قومية !
يعني شوفو مصعب باقي ليهو كم … وشوفو بكري المدينة عايز شنو .. وعمر بخيت لو ما كملتو ليهو قرشوم كلمو الكاردينال … وحتي المحترفين لو عندكم مشكلة في الدولار كلمو الكاردينال فالرجل اعلن انه جاهز لدعمكم بطلو مكابره وشوفو طلباتكم شنو وامشو ليهو ..!
الكاردينال وبعد الفوز المستحق الذي حققه فريقه علي المريخ ليلة الاثنين الماضي بقى (مبحبح) سلم اللاعبين حوافزهم .. وناس يوسف السماني جابوهو وعملو معاهو حوار واعلن جاهزيته لدعم المريخ ان أراد الراجل فرحان (بي حقو) فريق فائز .. ومتصدر … وقاعد يبني في الجوهرة .. وامورو طيبة .. قال يشوف اقرب الاقربين .. الموضوع ما زكاة ولا حاجة يا جماعة ما تتعقدو الموضوع انكم اخوتنا وجيرانا لازم ندمعكم علي الأقل عشان تكون في ندية والله ما ممكن نكون متصدرين بفارق 7 نقاط والمريخ ندنا وحبيبنا ظروف زي الزفت كدا مغلوب ولاعبنو عايزين قروش ولاعبي الهلال الدولارت يودوها وين ما عارفين … حرام والله حرام ..!

أخيرا أخيرا ..!
سمعنا برضو انو ناس المريخ قدمو شكوى في شيبون … قالو انو اللاعب دا لاعبهم .. قام الكاردينال بلغة الواثق قال ليهم عندنا قانونين كباااااار وعارفين بعملوا في شنو ما زيكم كدا … أقول ليكم حاجة قولو قدمتو الشكوى … وكسبتو المباراة .. وادوكم النقاط الثلاثة … وكسبتو مباراة هلال كادوقلي برضو انتو وصيف والسيد الهلال في الصدارة .. والله انا لو مكان لجنة المسابقات لمنحت المريخ نقاط مباراته مع السيد الهلال عارفين ليه ؟ عشان الدوري ما يبقى مسيييييييييييييخ معقول السيد الهلال يشيل الدوري من الدورة الأولى ببقى الموضوع ما حلو والله وببقى مافي تنافس ونحنا عايزين يكون في تنافس علي الأقل الفرق يكون نقطة او نقطتين بس عشان لما نجي نغلبكم في الدورة الثانية في استادكم نبقى اسيادكم وتاني مافي زول فيكم يقولو بغم ..!

أخيرا جدا ..!
خلونا من مباراة السيد الهلال والمريخ دا موضوع انتهى خلااااص وشيبولا وسادومبا عملو العايزنو واضافو النقاط لبنك الأزرق … تعالوا نشوف وزير الرياضة .. قالو السيد الوزير استدعى قادة الاتحادة لانو شعر انو بيان الاتحاد الأخير فيهو استفزاز ليهو وعشان الراجل ما يتحرج لو الجماعة نفذو التهديد واقاموا الجميعة قام استدعى قادة الاتحاد لمناقشتهم في موضوع الجمعية العمومية ولان قادة الاتحاد مستندين علي (حائط قوي جدا ) حائط الفيفا ، الجماعة مشو ليهو في مكتبوا واستجابوا لمطالبته بعد ان اوضحوا له انه لا يملك هذا الحق بالقانون … المهم قتل قادة الاتحاد الفتنة في مهدها … الفتنة التي حاول السيد الوزير اشعالها دون وجه حق !
قرار الوزير بتاجيل الانتخابات ذكرني بيانه ابان ازمة انسحاب الهلال … وبعد ان اعلن الهلال تمسكه بالانسحاب واهتز عرش الوزارة لجأ السيد الوزير للوساطة لحل الازمة .. والان يكرر زات الخطأ ويصدر قرارا ثم يستدعى قادة الاتحاد لحل الازمة ….هسي في داعي لي جنس دا ؟؟؟
اذهبوا فانتم الطلقاء

سودانافوق

تعليقات الفيسبوك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.