محمد عبد الماجد – (تيتيه) لو كبيت ليه (شطه) في عينو ما بتعمل ليه حاجة 4-6-2017

(تيتيه) لو كبيت ليه (شطه) في عينو ما بتعمل ليه حاجة

من رأسي :

ناس الاتحاد والمريخ وقت ما قدروا يهزموا الهلال بالشكاوي …كانوا عاوزين يهزموا الهلال بـ (شطه).

نحن الشطة ما بتعمل لينا حاجة.

تيتيه لو كبيت ليه (شطه) في عينو ما بتعمل ليه حاجة.

من كراسي :

انتوا المشكلة في المريخ بسبب جنسية (باسكال) ام بسبب جنسية (صلاح نمر) ، الزول دا اختفي نهائي من تشكيلة المريخ.

سبق للحكم معتز شطه امام الاهلي شندي في استاد الخرطوم ان حرم الهلال من هدفين..ما فيهم أي كلام.
وشطه قاعد لغاية الآن يحكم.
ليخرج الهلال مهزوما في تلك المباراة 2 / 0 من الاهلي شندي بسبب معتز شطه.
وشطه قاعد.
وسبق لشطه ان حرم الهلال من هدف صحيح سجله بشه في شباك المريخ لينقضه الحكم بحجة التسلل.
وشطه قاعد.
عمليتك دي يا (شطه) …(سلطة اسود) ما بتعملها!!.
سوابق هذا الحكم مع الهلال كلها تعدي وظلم واستهداف.
شايلها معانا عديل كدا.
ولا بدسها.
معتز شطه في مباراة الهلال والامل امس الاول صرف (3) ضربات جزاء لصالح الهلال.
عشان ما نبقى ليكم زي مامون ابوشيبة ..قولوا صرف ضربتين جزاء للهلال اصح من ضربة الجزاء التى احتسبها الحكم لفريق الامل عطبرة.
لو قلنا معتز شطة ما بشوف ..وما شاف ضربات الجزاء التى ارتكبت مع ولاءالدين ..ضربة الجزاء التى احتسبها للامل شافها كيف؟.
اشمعنا دي.
عاوزين نعرف.
ما قلت ما بتشوف؟.
وكاتل ضلك.
وعامل فيها ما عندك حيل.
اشمعنا دي شوفتها ..وجريت عليها جري.
الزول وقت يكون (مدفور)…في طرده للكوكي بكون ظاهر.
هسع الكوكي عمل ليك شنو؟.
شطه مالو مع الهلال؟.
الغبينة دي كلها في شنو؟.
يا زول مالك؟.
اهمد شوية.
الهلال كاتل ليك زول.
عمليتك دي ..(لامبيتي) ما بعملها.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووي) تجونا في الاجازة الكبيرة!!.
مباراة الهلال والامل كان يمكن ان يحدث فيها كارثة بسبب هذا الحكم (الكارثي).
فضيحة.
الزول دا ما عارف المباراة (متلفزة).
لولا فطنة تيتيه وكاريكا وولاء وابوعاقلة وشيبوب ..كان يمكن للهلال ان يخسر.
او يخرج بالتعادل في ظل هذا التحكيم.
لا اعرف لماذا يصبر مجلس الهلال على هذا الحكم ..وقد سبق له ان ضبح الهلال في اكثر من مباراة.
هذا الحكم يجب ان يقف في حده.
بدلا من ان يتسبب في وقوع كارثة – نحن في غنى عنها.
انا ما عارف الحكام ديل عاوزين شنو مع الهلال.
كأن شروط الالتحاق بجهاز التحكيم ان يكون عندك (صلعة).
وان تستهدف الهلال.
هذه كل مؤهلات (الحكام).
أي واحد عمل ليه (صلعة) عاوز يبقى (حكم).
وعاوز يبقى حكم عشان بس يستهدف الهلال.
امثال معتز شطة يجب ان يوقفوا في حدهم.
مجلس الهلال متي يريد ان يوقف هذا الحكم في حده.
وقد سبق ان نقض له هدفين امام الاهلي شندي.
وهدف امام المريخ.
تاني راجيين شنو؟.
في مباراة امس الاول لو الامل شد حيلو شوية مع المساعدات التى وجدها من الحكم كان على الاقل يطلع ليه بنقطة امام الهلال.
يعني هذا الحكم لو الهلال كان بيلعب امام المريخ او الاهلي شندي او هلال الابيض او هلال كادوقلي او الخرطوم الوطني ، عادي جدا يطلعك مهزوم في المباراة.
عشان كدا ما تنتظروا هذه المباريات بهذا الحكم.
التصريحات والهجوم على الحكم من قبل المجلس ومن قبل رئيس النادي الذي شهد الظلم الذي وقع على الهلال وحدها لا تكفي.
يجب ان تكون هناك خطوات عملية لوقف هذا الحكم وابعاده عن مباريات الهلال.
الزول دا لو جاني لابس شعار الفريق الذي يلعب امامه الهلال ما عندنا معاه قضية.
خليه يجينا بالباب عديل.
لكن يجينا لابس (حكم) ما بنقبلها منو.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووي) تجونا في الاجازة الكبيرة!!.
الواضح ان هناك الكثير من المباريات التى يمكن ان يتدخل فيها الحكم ليحول نقاط المباراة لصالح اندية اخرى.
الكوكي قال ان الحكم كان يلعب لصالح فريق اخر غير الامل.
واظن ان تصريح الكوكي واضح.
يمكن ان نجد الف (شطة) في مباريات الهلال القادمة ان لم يضع لهذا الحكم حدا.
التجاوزات يجب ان تحسم.
كفاية علينا لجنة سمير فضل.
الاسلوب الذي يريد ان يدخل به الاتحاد هذا الموسم ..هو ان يضرب الهلال بالحكام.
يمكن ان نشهد كوارث في مباريات الهلال القادمة.
الاستهداف كل مرة بيزيد.
والهلال اصلا ما بقيف إلّا بالحكام.
لذلك نريد من الجهاز الفني ومن اللاعبين ان يضاعفوا من جهدهم ، عشان يمكن ان يتعرضوا لمثل هذا الظلم كثيرا.
كما نطالب من مجلس الهلال ان يحسم مثل هذه التجاوزات.
ليس كل مرة تسلم الجرة.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووي) تجونا في الاجازة الكبيرة!!.
مباراة السبت امام المريخ ما عندنا فيها مشكلة.
الحكم لو صرف فيها 10 ضربات جزاء للهلال ..الهلال ان شاءالله غالب.
لو نقض لينا 6 اقوان.
برضو بنغلب.
كما ان المباراة (حبية).
لكن في المباريات الرسمية ما بنقبل بمثل هذا الاستهداف.
أي مباراة في الدوري بقت مباراة حاسمة.
ما في مباراة ساهلة.
وما في مباراة بيدخلها الهلال باستهتار او تهاون.
كل المباريات شدوا فيها الحيل.
وتعاملوا معها بحسم ومسؤولية.
ما بنقبل الهلال يخسر أي نقطة.
بل ما بنقبل أي هدف في الهلال.
خاصة ان الهلال في تصاعد مستمر.
والمصابون بدأوا يعودوا شيئا فشيء.
شيبوب رجع.
وابوستة.
وابراهومة.
واكرا.
ونحن في انتظار عودة بشه ونزار حامد لتكتمل قوة الهلال.
مباراة السبت الهلال بالرديف ان شاءالله قادر يحسمها.
بي شطة ..وبدون شطة ..الهلال قادر ان شاءالله يفوز.
ناس شيبوب وولاء الدين وصلوا للمستوى المطلوب.
هذا المستوى 120 امير كمال ما بقدر يقيف قدامو.
فقط مطلوب من جماهير الهلال الحضور يوم السبت.
عشان تستمع.
وعشان تتعشى بالمريخ.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووي) تجونا في الاجازة الكبيرة!!.
……………..

و

باسكال بدل ما يعمل ليه (جنسية).
عمل ليه (دقن).
عاد (الدقن) عاوز يحلك يا باسكال.
دقنك دا لو شافوه يوم السبت ناس ولاءالدين بشيلوه ليك برة.
الحلاقة علينا.
ما عندك أي مشكلة.
الزمالك بيدفع ثمن عدم الاستقرار الفني.
كل مباراة بجهاز فني جديد.
وقطاع رياضي مختلف.
الزمالك الآن يمكن ان يفقد المركز الخامس في الدوري الممتاز.
الزمالك خسر للمرة الثالثة على التوالي في الدوري المصري.
خسر امام مصر المقاصة.
وخسر امام سموحة.
وامس خسر امام الشرقية متذيلة الترتيب في الدوري الممتاز.
كل هذه الاوضاع سببها مرتضي منصور.
الرئيس (المشجع).
الرئيس الذي يدخل كل مباراة بمدرب جديد.
الكاردينال عليه ان ينظر للاوضاع في الزمالك ليعرف سوء عدم الاستقرار الفني.
الكورة عبارة عن انضباط والتزام.
واستقرار.
نحن في انتظار تصريح (ناري) من فوزي المرضي.
وإلّا اقول ليك يا فوزي ما تصرح ..عشان المريخ ما ينسحب.
بكرة عندنا مفاجأة ان شاءالله.
بكرة انتظرونا في (صفحة).
صفحة كاملة عن (جنسية) ضفر.
جنسية ضفر مالها كمان؟.
انتظروا بكرة بس.
ما تمشوا بعيد.
بكرة الجمعة جمعتنا.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووي) تجونا في الاجازة الكبيرة!!.
…………
السيدة (ل) – انتي والقهوة لو اتلميتوا في (صحراء) ناشفة بتعملوا ليكم (حديقة).
وقرّط على كدا.