دق الدلجة – محمد عبد الماجد – اقعدوا فراجة

من رأسي :

ناس المريخ لو كان اتأهلوا لنهائي كاس السودان ..كان الليلة قعدوا للساعة 6 مساء وانسحبوا من البطولة.

شابولا المجازفات ما بتنفع معاه.
من كراسي :

الانسان الحر حقيقة، هو ذلك الشخص الذي يرفض دعوة للعشاء دون ان يذكر عذرا..

جول رينيار

الليلة ستة إلّا ربع ، قول ستة شوكة، ما بيناتنا ..لو جبت ليك (4) انفار ..عندهم (صلع).
وبدون ما تشعر كدا – واثناء الكلام وانت منبسق في اللحظة دي ..قلت ليهم (شعوركم) شنو؟.
بتدخلهم في احراج لا اول ولا اخر له.
وانت ذاتك وقت تعاين للصلع متل (قوز الرملة) في القمره – بتحس بالاحراج ..وتدخل في (ضفورك).
تقول لي نفسك (طبظتها).
ما تعرف تمشي وين؟.
عاوز اقول ليكم (الشعور) دا زي ..(شعور) المريخاب الليلة.
ما عارف المثقفاتية العاجبهم شنو في كلمة (انبساق).
يدخلوها ليك في كل جملة.
الواحد فيهم لو عاوز ياكل ليه بامية مفروكة ..بدخل ليك كلمة (منبسقة).
انبساق مبالغ فيه.
طبعا المريخاب ما عندهم اي علاقة بـ (الانبساق) الليلة.
الليلة الانبساق ..انبساقنا برانا.
الحمدلله مباراة الليلة لا فيها (طلب فحص).
ولا فيها (انسحاب).
عشان حركاتكم دي – وعشان عارفنكم ما بتنستروا…طيرناكم من دور الاربعة.
جماعتكم الليلة لو كان وصلوا نهائي كاس السودان…كانوا عملوها لينا كلها (طلبات فحص).
ونحن ما بنلعب.
ومنتظرين الرد.
والطريفي لا.
والسموأل ما عاوزنو.
وعادل نيالا ..ما بنلعب لو كان حكم.
الليلة جرستهم كان وصلت (مدني).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
و(درررروري ضروري) تجونا في الاجازة الكبيرة!!.
لكن خلوني اسأل المريخاب من غير (صلع).
شعوركم شنو الليلة؟.
يا ربي ح يطلعوا التلفزيون.
لو طلعوه ما ح يفتحوه.
ولو فتحوه بفتحوا قناة الخرطوم.
قناة الملاعب اصلو ما بمشوا عليها.
اتعقدوا منها عديل كدا.
الليلة المريخاب ..متل الزول وقت يركب ليه حافلة.
يكون شايل معاه قروش قدر قروش تذكرتو.
ما زايدة قرش.
عشان كدا ما عاوز يرفع رأسو.
ما عاوز يتلفت.
زولكم اول ما يركب في الحافلة وبعد ما الحافلة تتحرك ..يتفلت وراء بشويش ..يلقى عماتو سبعة راكبات وراء.
جايات من المستشفى.
يعاين قدام ..يلقى خالاتو التسعة راكبات قدام.
جايات من بكا.
ما يعرف يعمل شنو؟.
يتصرف كيف؟.
يعمل فيها ما شايف.
يطارشن ..بتبقى شينة في حقو.
يطلع يقرأ في الجريدة…قديمة ..اتكررت كتير في (بص الوالي).
يركز في (الموبايل)…حركة جديدة.
يوتسب بس.
يتصرف كيف؟.
طبعا ما في طريقة (نزلة) – عشان الحافلة اتحركت.
والموضوع بقى ظاهر.
والكمساري قاعد يطقطق.
في كماسرة كمان ببدأوا من اقرب زول ليهم.
ما تعرف تتصرف معاهم كيف؟.
يبدأوا منك بس.
يعني ما في طريقة مخارجة.
تتداغل..عمتك ام سهمين ..تكورك ليك يا ود الحسن ..انت راكب معانا يا المبروك ، الله يشوفك ..الله يغطيك.
عماتك كلهن يقبلن عليك..وخالاتك يلتفتن ليك ..انت معانا في الحافلة دي يا ود الحسن..قلبنا رقد وقت شفناك.
الموقف دا زي موقف المريخاب الليلة.
يمشوا وين؟.
يتصرفوا كيف؟.
منتهى الاحراج.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
و(درررروري ضروري) تجونا في الاجازة الكبيرة!!.
المريخاب الليلة ..زي الزول البمشي المستشفى عادي.
ما عندو اي مشكلة.
بس بيشكي من شوية صداع.
تخش على الدكتور.
الدكتور ينزل ويطلع ليك.
ويصعب ليك الحكاية شديد.
يشفقك.
يسألك اسئلة كبيرة شديدة – ما عندها علاقة بالصداع.
فجأة كدا تلقاه بيسأل فيك اسئلة (تعسفية).
بتتعب وقت تطلع السلم..
بتعرق وقت تمشي مشوار.
بدون مناسبة كدا يقول ليك اعمل لي رسم للقلب.
يشكك في قلبك.
المريخاب الليلة نفس الحالة.
قعاد البيت حار.
وعدم الشغلة بتجيب الكلام.
والعطالة والفياقة …بتعمل اكتر من كدا.
عدم الموضوع.
الليلة المريخاب ح جيبوا (الجرايد) من الصباح…ما بقدروا يقرأوا فيها حاجة – ناس طلعوا من دور الاربعة ..الجرايد تكتب ليهم شنو؟.
قاعدين ساي.
الموضوع ما بخصكم في حاجة.
شوفوا ليكم (سيجة)..ألعبوا فيها على راحتكم – ما في زول بيسألكم.
ما في زول بقول ليكم شيء.
ضمنة.
ليدو.
بي طريقتكم.
كورتنا دي ما تمشوا عليها.
ان شاءالله يحسبوا ليكم (10) ضربات جزاء في (الضمنة).
هي الضمنة فيها (ضربات جزاء).
والله المريخاب ديل (ضربات الجزاء) في (الكوتشينة) يحسبوها ليهم.
ألعبوا سيجتكم بي طريقتكم.
السيجة لا فيها شيبولا.
ولا فيها بشه.
لكن صلاح نمر لو ظهر ليكم في (السيجة)..بكسر ليكم رقبتكم.
بي طريقتكم.
نحن ما عندنا اي قضية.
ان شاءالله طلب الفحص في (السيجة) تعملوه.
احرار.
الليلة اضانا ارتاحت من الشكوى من (التحكيم).
لو المريخ كان لاعب النهائي اليوم مع الهلال ..مامون ابوشيبة كان عمودو كلو بكون (ضربات جزاء).
ومعاوية الجاك عمودو كلو تحذيرات من شيبولا.
وهيثم كابو في يوم زي دا ما بكتب.
الليلة ارتحنا من (طلبات الفحص).
من مراقات المريخ.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
و(درررروري ضروري) تجونا في الاجازة الكبيرة!!.
الليلة قاعدين ساي.
لا عندكم موضوع.
ولا عندكم شغلة.
الناس في (مدني) وانتوا حايمين لي في شارع النيل.
تلعبوا في (الكوتشينة).
والاهلة مرقوها في مدني.
مجلس فيه (28) عضو..والنهائي بين هلالين.
فضيحة السواد.
بص الوالي ما بصل مدني.
بص الوالي حدو الكلاكلة.
اها عليكم الله الجماعة ديل مدني فشلوا يصلوها ..عاوزين يصلوا جدة.
عاوزين يلعبوا في البطولة العربية.
وهم بطولة كاس السودان طاروا منها.
مدني دي لا محتاجة (طيران).
ولا عاوزة ليها (تأشيرات).
مالكم؟.
المانعكم شنو؟.
غايتو الزول وقت يكون فاضي ..وما عندو موضوع.
ممكن يحلق رأسو (7) مرات في اليوم ..وهو رأسو صلعة.
عدم الموضوع.
…………..

و

اتمنى واسأل الله ان يحسم الهلال المباراة في زمنها الاصلي.
وان يحسمها مبكرا.
وبعدد من الاهداف.
لكن اذا انتهت المباراة بالتعادل وتم اللجوء للضربات الترجيحية ..اعتقد ان جمعة اكثر تميزا في صد الضربات الترجيحية من مكسيم.
خاصة في ظل تألق زكريا حيدر حارس هلال الابيض.
جمعة في الضربات الترجيحية خطير وموفق.
يعني المباراة لو كانت لغاية الدقيقة 85 تعادل يبقى مشاركة جمعة بديلا لمكسيم افضل للهلال.
والاكيد ان الجهاز الفني للهلال ادري بذلك.
مجرد ملاحظة.
نحسمها في ملعبها.
لا في مكتبها.
ولا بعد انتهاء زمنها الرسمي.
بنحسمها في وقتها ان شاءالله.
المباراة ما ساهلة على الهلال.
يجب ايقاف دوافع لاعبي هلال الابيض القوية.
ويجب ان يلعب الهلال بدوافع وحماس اكبر حتى يحقق البطولة.
مهند الطاهر يجب ان يتعرض لمراقبة لصيقة ….خطورة هلال الابيض تتمثل فيه.
وكذلك موكورو ومفضل.
الكورات العالية دفاع هلال الابيض موفق فيها بشكل كبير.
التمريرات القصيرة والارضية يمكن ان تشل هلال الابيض وتهزمه.
ان شاءالله.
وباذن الله وتوفيقه الهلال العاصمي اليوم بطلا لكاس السودان ..ليجمع بين الدوري والكاس.
ولنعيش الفرحة فرحتين.
بكرة جمعة الجمع بين البطولتين باذن الله.
والفرحة بتبدأ الليلة من العصر.
……….
السيدة (ل) – البرد الايامات دي بمسكل ويرجع.
وقرّط على كدا.