محمد عبد الماجد – شابولا اختصاصي جراحة (ضربات الجزاء) و(الكروت الملونة)!! 1 اغسطس 2016

2016-08-01

دق الدلجة – محمد عبد الماجد – شابولا اختصاصي جراحة (ضربات الجزاء) و(الكروت الملونة)!!

من رأسي:

الخرطوم في المطرة متل (الشافع) وقت تفكو براهو في صينية فيها (ملاح خُدره) و (بامية مفروكة) – تلقاه لخبط الصينيه كلها …

ووسخ خشمو ..وايديه …وهدومه.

هو – من صحن (الخدره) ما بتقدر تفرزو.
من كراسي:

اذا قورن المخ البشري بالمخ الالكتروني ، فانه يوازي مخا يحوي على الاقل 15 الف مليون انبوبة الكترونية.وقد اجري هذه المقارنة الدكتور (جوهانس شالريه) والذي يؤكد ان المخ البشري يحتوي على 15000 مليون خلية عصبية ،كل منها تعمل بقوة واحد على الف مليون من (الوات) ، ويعمل المخ كله بقوة تبلغ حوالي 10 وات.وعندما يؤدي المخ عمله ويولد تيارات كهربائية مباشرة ومتغيرة ،فانه يعمل بقوة تتراوح بين واحد على الفين وواحد علي 200 الف من الفولت ، بذبذبة تتراوح ما بين 8 الى 14 سيكل في الثانية.

اقول ليكم حاجة – (كدا واحد فيكم يقوم يقفل الباب دا).
وانا زي بشوفك طالعة من غير تدخلي…
اقعد اقصقص في الاماني ..الواردة بي حسن الظنون…
واطلع على الشارع اقيف…
وانا بين تصب ..او ما تصب…
يبرق وشيك…
كل الاماني الفيني تلملم عليك..
وينقط الشوق في العيون..
اغرق افيق…
امرق على البيت الكبير …
تمطر اجيك…
اقول ليكم شيء زي (البنت السمحة) في الحفلة ..اي اغنية يغينها الفنان بتفتكرو قاصدها.
وهو ولا جايب خبر.
ولا عارفها.
زمان انا كنت شايف (اكرا) دا زول (جراي) خلاص.
القصر فتنة.
يفكوه في النص ..ما تشوفه إلّا في خط ستة.
وشايف (كوفي) زول خطير.
قايل الحلاقة تحتها (فكي).
طلع حلاقة ساي.
لمن شفتوا (الجري) البعمل فيه (شيبولا) – اكرا بقى لي زي السلحفاة.
وكان لي كوفى – بقى لي ما عندو اي فرق من موسى الزومة.
اتارينا نحن كنا مغشوشين غشة في الدنيا دي.
هسع يا جماعة لو حاولنا نجتهد كدا …وبقى عندنا كورة زي كورة برشلونة.
ميسي يبقى ميسي الزومة.
وموسي الزومة يبقى يبقى ليونيل موسى.
دا ساي شراب الشاي بالتمر.
زي الحفلة الجنبها بكا.
بالمناسبة الموضوع دا ما صعب لو لقى ليه اعلام قوي.
ميسي ذاتو تاميها (اعلام).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
خلونا هسع في (عزيز دنياي).
او عزيز شيبولا.
هسع عليكم الله لو ما ساي البلم (عزيز) مع (شيبولا) شنو؟.
ناس المريخ لو عرفوا المعلومة دي ممكن يقدموا ليهم شكوى.
او على الاقل يطلعوا ليهم (بيان).
عزيز شيبولا.
متل الزول البمشي يجيب ليه (صابونة) من الدكان ومعاها (شاي حب).
في علاقة بين الشاي الحب والصابونة.
او زي صالون الحلاقة البتلقى مكتوب فيه (يوجد بالصالون تحويل رصيد).
ممكن شيبولا دا يكون اسمو عزيز الطيب.
عزيز عباس.
عزيز عمر.
لغاية عزيز حسان ذاتو معاه.
لكن عزيز شيبولا دي ما سمعنا بيها.
صراحة كدا.
ولا بنضكب في الحتة دي.
ولا بنجامل.
افتكر دي الحاجة القاعد تلخبط المدافعين.
اقول ليكم شيء.
نحن ساكت شلناها مع ناس الاهلي مدني.
وناس المريخ.
مباراة مدني دي ما في شيء وصلها الحد دا غير (شيبولا).
شيبولا اي لاعب في الاهلي مدني منحو ليك (كرت).
تقول ماسك ليه حملة تتطعيم.
شيبولا رئيس النادي في المقصورة ما خلاه على راحته.
لحقو ليك بي بدلته.
عليكم الله هسع الانسحاب دا عاوز ليه (بدلة) قدر دي.
يقولوا ليكم الكلام الف مرة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الشيء الظاهر ..ان شيبولا رفع نسبة الكروت الملونة في الدوري الممتاز.
الاهلي مدني في مباراة شال ليه (11) كرت.
عندكم شنو اصلو.
ولولا هروب ابوبكر عامر حارس الاهلي الكروت كانت ارتفعت الى (12) كرت.
(3) كروت حمر ..و(9) كروت صفر.
عليكم الله هسع الكروت دي في (مناسبة) قاعد تلاقيكم.
ناس الاهلي مدني لو عندهم عرس …الكروت بتاعتهم ما بتصل للرقم دا.
شيبولا غير تخصصه في (الكروت الملونة) ..يعتبر اختصاصي جراحة (ضربات الجزاء).
الزول دا ما شاءالله عليه في اي مباراة عندو (ضربة جزاء).
زول سريع.
وحريف.
وبدخل تحت الكرعين.
ما بتعرفو.
فجأة بتلقى قدامك في خط 18.
في مباراة الهلال والمريخ ..ِشيبولا طلع ليك مصعب عمر من المباراة.
الجهاز الفني للمريخ طلع مصعب عمر ..لكن بعد ان ارتكب ضربة جزاء مع (عزيز دنياي).
في مباراة الهلال وهلال الابيض ..الحكم رفض يحتسب ليه ضربة جزاء ارتكبت مع شيبولا كانت اوضح من الضربة التى ارتكبت معه في مباراة المريخ.
في مباراة الهلال والاهلي مدني ..مدافع الاهلي عمل ليه ضربة جزاء في الدقيقة 91 مع شيبولا تسببت في انسحاب الاهلي من المباراة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
حدث كل هذه الاشياء في (5) مباريات لعبها شيبولا في الدوري الممتاز.
يتخيل لي شيبولا لمن يرفع من معدله البدني ويدخل في الفورمة اكتر ح يكون اخطر من كدا.
شيبولا دا كنز.
جبتوه لينا من وين …نحن ما عارفين.
مصنع كروت.
منجم ضربات جزاء.
الهلال كان يحتاج الى هذا اللاعب.
عنده حلول براهو.
وعندو طريقة مميزة.
بنرفز ليك الخصم ..وبرفع ليك معدل الكروت.
وبتسبب في ضربات الجزاء.
غير المخالفات التى ترتكب معه خارج المنطقة وتتسبب في طرد اللاعب الذي ارتكب المخالفة.
في وجود شيبولا اي فريق يلعب امام الهلال لو وجد تحكيم عادل سوف يلعب ناقص.
يجب الاستفادة من تلك الخصائص اكتر.
ودعمها ..والعمل على تطويرها.
امام الاهلي مدني شيبولا كان النجم الاول في المباراة.
قدر ما ضربوه.
قدر ما فلقوه.
الزول دا ما شاءالله عليه ما وقف.
والجميل ..وقت الهلال يسجل بيمشي يسجد مع ناس بشه وكاريكا.
امام الاهلي في كورة عكسها شيبولا (كبسولات).
بضربة خلفية.
فقط على شيبولا ان ينتبه للتمرير للاعب الذي يكون في موقع افضل عندما يدخل خط 18.
في مباراة مدني كانت هناك كورة لو مررها شيبولا لمحمد احمد بشه بدلا من تسديدها في المرمي كانت يمكن ان تكون هدفا.
الجهاز الفني يجب ان يصلح شيبولا في هذه الاشياء.
كما يجب من سادومبا وبشه وكاريكا التمركز الصحيح عندما تكون الكورة مع شيبولا في خط 18.
اقعدوا مع بعض ..وناقشوا الحتة دي.
وتدربوا على اسلوب ومواقع معينة ليتم التمرير فيها تلقائيا من قبل عزيز شيبولا.
هذه الامور يمكن ان تأتي مع المباريات.
الاكيد ان التفاهم والتجانس عندما يرتفع حسه في الهلال سوف تكون استفادتنا من شيبولا اكبر.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………