محمد عبد الماجد: الواد ده بيذاكر من ورانا” .. ونحن ساكتين ولا بنقول حاجة – عارفين ردنا ح يكون بعدين

من رأسي :

لو (امير كمال) فكر صاح ، الليلة من بعد الفطور يقول شعرت لي بي (دوشه) – ما في مدافع عاقل في الدنيا دي بواجه كاريكا وسادومبا في وقت واحد وفي رمضان وفي الجوهرة الزرقاء كمان.

من كراسي :

عند خروجي من السجن أدركت أنه إن لم أترك كراهيتي خلفي فإنني سأظل سجينا..

نيلسون مانديلا

(19) سنة و (9) شهور و (9) ايام ، ناس المريخ اي لاعب في الهلال يظهر كدا يقولوا ليك دا (ولدنا).
مسكتهم ليك عقدة في الحتة دي.
اللاعب البيعكس ليه كورة بصورة (هندسية) بقولوا عليه : (ولدنا).
اي لاعب يطلع فيها ..يقولوا ليك (ولدنا).
بقوا يتشبكوا في (اولادنا).
ونحن ساكتين ولا بنقول حاجة – عارفين ردنا ح يكون بعدين.
وعارفين وقت الموضوع يسخن ما بقدروا عليه ..وبقوموا جاريين (الفيفا).
الحمدلله طلعتوا بتعرفوا (الفيفا).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مهند الطاهر سجل فيهم مية قون ..بعد اي هدف يسجلو مهند الطاهر يقولوا ليك : مهند الطاهر (ولدنا).
مهند سجل في بهاءالدين قالوا (ولدنا).
سجل في رمزي صالح قالوا (ولدنا).
مهند سجل في عصام الحضري قالوا (ولدنا).
طيب الزول دا لو ما ولدكم ..كان عمل فيكم شنو؟.
مهند طلع في (عراضات) استاد المريخ ورفع علم الهلال – وجماعتكم برضو بقولوا في مهند الطاهر (ولدنا).
غايتو ولدكم دا عمل فيكم جنس عمائل.
بعمل فيهم العمائل دي كلها ويقولوا ليك (مهند ولدنا).
انتوا الهلال دا وقت عاجبكم قدر كدا ما تشجعوه بالباب عديل – بدل ما تشبكوا في اولاد الناس.
بتكسروا ليك في اقوانا كسيّر شديد.
مسكوا ليك المعز محجوب دا (ولدنا) – ولدنا – لمن بقى من قدامى اللاعبين في الهلال.
لمن نزل معاش وبقى (جد) في الهلال ..وهم بقولوا ليك المعز محجوب (ولدنا).
اتلحوا ليك عمر بخيت دا لمن بطل الكورة – وفكت منو.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن شفوت.
وعارفين اي حاجة.
وحقنا ما بنخليه.
وما بنرضى الحقارة.
والحال المائل في (الخصم) ما قاعد يعجبنا.
ما بنجامل في الموضوع دا.
قلنا ناس المريخ ديل إلّا نفهمهم ليك حاجة.
نديهم ليكم (درس).
وفي النهاية نقول ليهم انتهى الدرس!!.
موضوع (شيبوب) جماعتكم ديل لغاية الآن ما وقع ليهم.
ما فهموا فيه اي شيء.
يعيدوا ليهم الدرس مية مرة ..برضو ما عاوزين يفهموا.
الجماعة ديل بعد كدا إلّا نعمل ليهم حكاية الحمامة البترضع صغارها.
الكاردينال اشتغل ليك الموضوع بي (مخمخه) عالية.
اتصور مع (شيبوب) وفك ليك الصور في مواقع التواصل الاجتماعي.
النار دورت ليك في الجماعة.
مرة يخطفوه.
ومرة يتلبوا بيه من الطابق الرابع.
ما خلوا ليهم (مطار).
الجماعة حايمين ليك بي (شيبوب) من مطار لي مطار.
من غير اوراق ثبوتية.
قالوا ما بتسجل في (الملكية) جوبا.
نحن قلنا ليهم القال ح يتسجل في المليكة جوبا منو؟.
العملية دي (تمويه) ساكت.
العملية ما بدأت من هنا.
الموضوع اكبر من الملكية جوبا.
قعدوا يعملوا لينا الذراع الطويل.
والذراع القصير.
والذراع الشنو داك ما عارف.
نحن قلنا ليهم غايتو عشان (ذراعكم الطويل) دا ..نحن شيبوب دا بنفكو ليكم.
نخليه يتصور معاكم في مطار الخرطوم.
ويمشي بيت اسامة ونسى.
ويتصور مع اسامة ونسي.
ويفطر في بيتو.
لكن بعد (الفطور) دا تاني ما تسألونا منو.
معقولة عندكم لاعب بالقيمة دي الجزائر كلها بتتكلم عنو تخلوه (هاوي) وتجروا وراء (ولاد) الهلال.
ثبتوا موقفكم اول حاجة.
آمنوا حالكم.
من ثم تعالوا هابشوا ناس الهلال.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ناس المريخ طبعا لغاية الآن ما فاهمين حاجة.
لسه الموضوع ما قادرين يستوعبوه.
الموضوع باقى ليهم صعب.
جماعتكم بقوا يهضربوا بـ (الفيفا).
الواحد فيهم لو لاقتو في موقف جاكسون تقول ليه ماشي وين؟.
يقول ليك ماشي (الفيفا).
الفيفا طارت ليهم في رأسهم.
انتوا قايلين الفيفا دا (مكتب الوالي).
سجلتوا بكري المدينة ما في زول سألكم.
سجلتوا المعز محجوب ما في زول سألكم.
سجلتوا عمر بخيت ما في زول سألكم.
الموضوع ليه بقى ليكم حار في (شيبوب).
نحن كنا حذرناكم.
قلنا ليكم موضوع (ولدنا) دي بتوكم.
لكن انتوا ما فهمتوا الرسالة.
عشان كدا كان الرد الحاسم عبر عملية (تشيبوبيون).
يتصور معاكم.
يقفز ليكم من الطابق الرابع.
في النهاية الولد بيلبس الكسكتة.
انا عارف حكاية يمشي (شبيبة القيروان) ويرجع تاني للهلال كبيرة عليكم.
دي عاوزة ليها (سنة) عشان تقع ليكم.
الناس ديل لغاية الآن (كبري) المك نمر من توتي للخرطوم عامل ليهم (هجمة).
لغاية الآن جماعتكم ديل مهجومين من الكبري (الطائر) دا.
تجي انت يا الكاردينال تعمل ليهم كبري من ام درمان للقيروان.
من الشبيبة للهلال.
والله دي .. للسنة القادمة ما يفهموا لينا.
ناس متوكل احمد علي (جسر) في الحلة ممكن يجهجهم ليك.
عملية (تشيبوبيون) كانت الرد الكافي على حكاية (ولدنا) الشباكننا بيها دي.
شلنا لاعب صغير في السن من المريخ.
احرف لاعب وافضلهم في هذا التوقيت.
زول صغير في السن وطويل في القوام ..وبيلعب ارتكاز.
يعني فيه كل المواصفات النادرة في عالم كورة القدم.
الاخطر من كل هذه الاشياء …شيبوب نحن شلناه من (الكشف).
من جوة.
ودي ما حصلت في عالم كورة القدم في السودان.
يلا بعد كدا عاوزين تمشوا (مكتب الوالي)…احرار.
عاوزين تمشوا (الفيفا) قشة ما تعتر ليكم.
عاوزين توصلوها السماء …نحن معاكم.
وقت ما بتقدروا على حماية اولادكم ..بتهابشوا ليه.
شيبوب الليلة ان شاءالله سوف يكون في الظهور الاول.
شييوب الليلة رسميا ح تشوفوه بي شعار الهلال.
اقعدوا ابكوا.
هددوا.
فنجطوا.
قولوا ح نمشي (الفيفا).
اعملوا اي حاجة.
الليلة عشرة ونص في الجوهرة الزرقاء – شيبوب عندو (حفلة).
كورة شيبوب التى لم تعبر في الجزائر – الليلة ان شاءالله ح تعبر.
تعالوا شوفوا بقية العملية.
تشيبوبيون فيها باقي.
ما تفوتكم (الحفلة).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………….

و

عادل امام في مسرحية (مدرسة المشاغبين) عندما وجد احد زملائه في الفصل بجاوب اجابات صحيحة على المعلمة قال : ( الود دا بيذاكر من ورانا).
بكري المدينة غايب ليه شهر ..وعامل فيه مصاب ..مع ذلك عاوز يشارك في مباراة اليوم.
يا عمار الدمازين (الود دا الظاهر عليه بيذاكر من وراكم).
احسموا الموضوع دا.
وعلاءالدين يوسف مصاب.
وامير كمال وزنو زايد.
وصلاح نمر تقيل.
وجمال سالم ليه 40 يوم ما شاف ليه كورة.
يعني كل العوامل متوفرة الليلة ان شاءالله لانتصار الهلال.
ابعدوا من الضغوط ..وما تتوتروا.
المباراة اكتر من عادية.
ألعبوا كورتكم بقوة وحماس وروح قتالية نضمن ليكم الانتصار ان شاءالله.
الضرب والعك ..ما ممكن يكون طريق للانتصار.
خلوا قلوبكم حارة.
الناس ديل ما عندهم اي حاجة.
ما تركزوا مع (الحكم) كتير.
ركزوا في (الكورة).
الخصم ذاتو ما تخلوه يوتركم.
ما تطلعوا من جو المباراة.
انتوا في الجوهرة الزرقاء.
انتوا في داركم.
الانتصار ان شاءالله سوف يكون حليفكم.
نحن نثق في ذلك.
ونعرف ان مدثر كاريكا الليلة ان شاءالله عندو (قون).
قولوا واحد.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
السيدة (ل) – الدقيقة عشرين ..الدقيقة ستين ..الدقيقة تسعين ..الهلال ان شاءالله ح ينتصر ..ح ينتصر.
وقرّط على كدا.

تعليقات الفيسبوك