وئام كمال الدين-بت اصرار (فيديو)

وئام كمال الدين
بت اصرار

من رحم الوجع مولودة
لونا جميل برغم السمرة
ريحتا صندلية وخمرة
أجمل صيدة واسمح مهرة
حارسة الصاج وعايسة الكسرة
سمحة ضمة ما منكسرة
شايلة الريدة حافظة العشرة
فيها عقاب دعاش المطرة
تلقاك بي حبابك عشرة
ما بتشوف عليها الكشرة
زي النيل مستفة حسرة
حزنها شق صمت العبرة
يمرق بالمغايس نبرة
تعزم في الدموع للمرقة

من طيبة البلد مصنوعة
كل أوصافا تب مجموعة
روحا وريحتا ومجموعا
في مهد الجراح موضوعة
بي يوم بكرة ما مخدوعة
تترقب رحيل الفرحة والدمعة القبيل مجدوعة
دي البتمنى ديمة رجوعا
صورتا في الفؤاد مطبوعة
ضحكتا في السكات مسموعة
باسمة وإن بقت موجوعة
بالألم البزيد الشرقة

عمرها ألف قصة قديمة
أقدم من شجرة النيمة
بت ما كملت تعليما
سارحة بترعى ليها بهيمة
فاردة وشيها ماهي لئيمة
صح ماعندها المليمة
جد فقرانة إلا كريمة
عينا ملانة تحمد ديمة
ما بتعرف دروب السرقة

ومن قامت تريد الحلة
تحكي عن البعيد والخلة
ترتى علي هموم خلق الله
رغم الجور بهيجة طلة
كاربة بيوتا ما بتتحلا
عن إيمانا ما بتتخلى
تدعي المولى يهدي الضل
لا بتتهان ولا بتتذلا
ما بتطاطي غير لي الله
صوتا بيعلى رغم الخنقة

صوتا ينادي حالا السادي
نفس الخوف ونفس الكلمة
نطق بي حنينو البغمة
طاري الجار وحس اللمة
جدعة توب ولفة عمة
حس دوبيت وجرة نمة
ويا تربالنا سولك همة
في الشمش البتحرق حرقة

شايلة من القصص كمية
في جواها راكوبتنا والقطية
والجرارة والطورية
دق الريحة والصبحية
والألفية
والحولية
بيت الزار وصوت لولية
كل الدايرو فيها بتلقى

بت في الجوف ملانة حنان
ما بتبخل علي العدمان
تتجود علي الضيفان
بت بتقول أنا ام درمان
أنا السودان
وزي النيل بتسقي الظامي والعطشان
وتروي جنان
ووقت الجن تشيل الغرقى

لا تلفانة لامعيوبة
ديمة عديلة مي مقلوبة
دارا عامرة ما مخروبة
بت غنيانة فاضية جيوبا
سيرتا بالفرح مصحوبة
فرحة عيد ودقة نوبة
حس( اصرار) وحن حبوبة
وقت الحارة ساعة الحوبه
للفرسان بتكرب توبا
ريدتا في دماي مصبوبة
صورة تجسد المحبوبة
وتصور عذاب الفرقة

https://youtu.be/jW91PMAL3vs