وئام كمال الدين
الباقي ليك خمسة

اختار رقم حزنك ما تقولو يا الغبيان….
والدك ملاهو الهم و أداك كمان قدرو شان أنهكو الحرمان….
وأنا رغم قربك لي زدتك عليو عشرة الفقر و الحاجة
و الدمعة و العبرة
وعطالة و استغلال
و الجوع وضيق الحال
وضياع رخا الأسواق وكرامة الانسان…..
أمسك جرابك زين ماتملى بالحسرة وما تلخبت الكيمان…..
مش قالو جانا السيل
أدي البحر نصو كان تمنع الفيضان……
رجع كمان الدين لي والدك التعبان….
الباقي ليك خمسة
وطنك صبح مقسوم
بيتك صبح مهدوم
فرحك صبح معدوم
همك صبح مردوم
والكل صبح مظلوم
يا حليل زمنا زمان….
الصحبة والخلان ….
يا يمة جيبي شلن
بي سرعة للدكان…
عم طه كان بيقول
مرحب حباب عثمان…
ياعمو داير لي حربة وحلاوة لبان……
بي سرعة شان ألحق العب مع الجيران….
النور و ود الزين بيحبو لعب الطين ود أبكر و الخير و أدروب و جون وحسين و سلامة ود جرجس ماشين على الميدان….
شان يلحقو التمرين
ما كانو بس جيران ديل كانو جد أخوان….
حبوبة حجتني
بي السمحة والغيلان…..
بي قصة الراعي والديب مع القطعان..
بالفارس المغوار وبسالتو في الميدان….
بالعمدة راجلا زين كيف بكرم الضيفان…..
والحاكم العادل والقسط في الميزان…..
يا حليل حجاها الكان…..
مديت كفوف رحمة
لي روحا يا رحمن…..
وبصمت بالخمسة
الوحدة والذكرى
والخوة والنصرة
والخامس التحذير أوعك تكون غلطان…..
قالتلي بي همسة
اختار رقم حزنك
ما تقولو يا الغبيان…….
و اتلاقت الأرواح
مدت كفوف الشوق
لعبت معاي ضباح
ضباح ضباح
كسرة بملاح
ده الضبحو
و ده السلخو
و ده القطعو
و ده القسمو
و ده الأكلو
و الباقي ليك خمسة

تعليق بواسطة فيسبوك

التعليقات


مواضيع يمكن ان تنال اعجابك



اترك رد وناقش الاخرين