وئام كمال الدين
يابنية أرح أقليهو البن

يابنية أرح أقليهو البن

يا مسودنة فيني عروبة الكلمة أصالة ونخوة مروة وحن

يامدكنة فيني سواد أفريقيا ممالك نوبة حضارة وفن

يا معجنة من تيراب القيف بي موية النيل معجونة عجن

ومجننة كل الرادك جن

داويوهو البن !!!!!

زيديهو الكيف

سويهو تقيل زي همي البي ما دايرو خفيف

يا أجمل طيف

كيفنك كيف
وكيفن البن!!!!!!!

يابنية سلام

مكتول في قفص أحلامنا حمام

هو اتقطع كيف وصبح أقسام

يا السمحة الزيف ولع نيران المنقد وكيف
هبابتك زايدة النار إضرام
شان تقلي البن!!!!!!

يانسمة تبرد حر الصيف يا دافية برغم البرد الجاف

ماعارفك كيف !!

محتملة الجور القبحو مخيف والزمن الصبحو سنينو عجاف

يا مدوزنة فيني غناوي الريدة مدن وأرياف

مجنونه حروفا مرقت من حسنك أوصاف

وانا جد أدمنتك واتخطيت حد القرياف

قرياف البن””!!!

يا نبتا وكوش…. وكنداكة وحكامة وحرة

يا أحلى عروس حورية ومتقلدة درة

يا معبد في منطق هميروس و وقارك ضاهى جبل مرة

يا قاسية ووشك ديمة بشوش معشوقك ليك النم جرا

وأنا زول راكوبتك وهذا الحوش وجبنتك أنا بشربا مرة

وراميني البن!!!!!!

يا ممشطة شعرك بي إتقان يا السارقة ضفايرك من الليل

كيفن حاكيتي قوام البان يا الشايلة شموخك من توتيل

يا اللونك للأبونسة دهان ومزاجك جامح زي النيل

يا موطن غير كل الأوطان ودرني و ودر قبلي شليل

عينيكي تفوح بي ريحة البن!!!!

و انا داير أصبر وغالبني والله متصبر بيك انتي

ما قادر أصرخ من جرحي وشايفك مجروحة وكابرتي

حزني المردوم جاريهو جبال و حزنك زي توبك جرجرتي

وأنا قلت تزيلي الحسرة البي و قلبي المغبون ما صبرتي

يابنية مليتي دواخلي هموم لا رتيتي علي لاقدرتي

وبدل ما تيقني عاشقك كيف جهجهتي مريدك وحيرتي

وكيفن كترتي الهم جواي ودمي البفداك كيف فورتي

وفورتي البن!!!!!!

تعليق بواسطة فيسبوك

التعليقات


مواضيع يمكن ان تنال اعجابك



اترك رد وناقش الاخرين