انا لا ابراهيمك لا رؤياك – نضـال حسن الحاج (فيديو)

انا لا ابراهيمك لا رؤياك
  نضـال حسن الحاج

انا لا ابراهيمك لا رؤياك
انا لافرعونك لاموساك
لاثعبانك لانى عصاك
انا بس يادابك.. يادابك ساكنه مسامك
وجبرا جاريه مجارى دماك
ومقطع اول
ماغشيتك
اتوكيت عصاة احلامي دخل واديك
عفوا ناديتك
وشلتك ريحه مطره وقبلى وولع نارك يوم خشيتك
ودقيت بابى واستاذنه فتحت الباب بسراع لاقيتك
وعشعش فينى خيالك جوه .
..وكنت الزول الضعف القوه
وكت ات ادم وكت انا حواء
سلبت الريد الصادق منى وكان الريد مسكين بتلواء
ودون ما اشعر كت بحتاجك.
كت بحتاجك لما تعفرت سحب الوجعه ..تسكن خوفى
وكت بحتاجك لما تطش الكلمه الحلوه تلولى حروفى
وكت بحتاجك تملاء مراقك فينى وتسكن اخر جوفى
وتبقى القلب النابض انت ورهف احساسى وعافيه شوفى
ومقطع تانى
ولاناديتك
الناداك احساسى وشوقى الشد خيولى وقت لاقيتك
وجيبتك منى جنين مستوطن عصب الفكره
وقمت تاتيتك
يوم فرعون الزمن الظالم فتش عنك انا داريتك
واوحى خيالى توانس يم احساسي المرهف وفيهو ختيتك
وكان تابوتك انى اوسد ذاتى مسامك وفجاه ،، رميتك
ولما رميتك
اتمازجتا الولد الفطره
واتكونت الريد الفكره
كنت صباح الليله وبكره
وكنت شعاع الزمن الغاتم ونور الحاضر
وذات الزكرى
ومقطع ثالث
ما غنيتك
الغناك دا الوتر الحاير وانا مابنكر
استنيتك ..لا وصلتك لا شريتك
انا لا درتك لانى ابيتك
لا اشركتك لا صليتك
لا اتيممتك لا اتوضيتك
لاطلقتك لا رديتك
لا استنشقتك عنصر تالت بدي مجال لاي تاكسد
في كريات الريد في بيتك
انا ادمنتك لما عذاب الزمن استوطن فيني خراب
ورجعتا مشيتك سكه تلملم باقي الحسره تخسف بى
لو ما داريتك ؟ وانا داريتك
انا داريتك
بين شطأن البال والخاطر
وفى ضل ليل الغيم الماطر
وفى همسات اطفال بتغنى
فاطمه السمحه وحسن الشاطر
ويانى السمحه وياكا الشاطر
لانى زليخه عشان ما اراودك
ولاك ات يوسف عشان ماتابا
لا شديتك عود وربابه
ولادقيت ايقاعك مبدأ ولاحرشتك تمشى الغابه
ولاكلمت البحر يتبخر شان ماتطلع انت سحابه
واخر مقطع
انا بالجد بالجد حبيتك
وانا بتوكل ادخل جواك مادام بالانفاس تاويتك
وانا بتوسد عصبك عنوه وتسكن انت رؤاي
ياريتك .. وينو غناى كان ماغنيتك
وشن غنيت لو ماغنيتك
ومات طالعني اذا ماقدرت افرتق كتلت حسي واصارحك
استنيتك وكل مايوت تشرق شمس الله
بتتاتي غرامك فيني واشيلو متل ما في جواي تاتيتك
مالولاي ماكنت قدرت تلولي الزمن الفيهو واريتك
وياني عصير زيتونك ونارك
وضو مشكاتك ونورك وزيتك
بس لو تمسس روحك فكره
انى نسيت اسمى ومانسيتك

تعليقات الفيسبوك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.