وينو المفر..؟! نضال حسن الحاج
وينو المفر..؟!
نضال حسن الحاج
*****
يوم غير المطر اتجاهو وجهجه الضل..
والحراز انحت قبال الخريف
سنوات قصايدنا العجاف..
فتحت دروب الشحده في وش كل صيف
ربطت بنية إحساسي راسه ورمية القلوه
بتخربش تنتنة بناته في أعماقي كيف
شفع فريق الريد بدورو الفكه من جيب أي ضيف
وانا كت بحنس في السكات لو يوم إطيب
خاطر القول الجرح قلب الحبيب
يا دا الكلام الشق جوف الليل وسرّب
شفعو البتباكو من باب النحيب
يا دا الغنا اليوماتي مماقمت بتونس حضورك.. ومرقتك
كيف احتشادك في شهيق اللحظه.. كيفن كت قريب
وانا وانت والقمره بتمد ايديها تشحد ضو
عشان تستر جسد شمش الله وكتين تنكشف سيقانه تمرق للمغيب
ما تحنس اطفال القصيده الحلو ما يصحولي بي هادا الضجيج
المافي حضرة حضرتك شان ما تغيب
والله هسع كوني ما أكتب علي باب الغياب الجبري
انك جيت وما لاقيتني في قلبك دا أكبر واشنا عيب
وانا ساي ركب مركب مرور نوح
ما انتبهت منو البسد فرقة ولاد آدم معاي
اتنين نكون وخلاص
وناديت عشقي بي إحساس غريب
ورحلنا في درب الحياه الوقافي ماكل
ونام علي فدة كراع في الحر ولا إحتاجلو ضل لاعنقريب
شمش الله بتلكد خباره أها الشعاع دا وكت يهبشك
مالو كان راعي اندفاع الغيره في مجري الهوي الموجاتي في بطن البحر
ياخ ات فاكر ساك علي كيف انتباهك
لي غياب فرحي وحضورك إنت حر
لكن مدام هادي الشمش تابعاها تاء تأنيث ومي متل المطر
من حقي اطمن علي كونك
ممدد في ممرات ضلي
واديك سر تعاويذ الهوي التكفيكا وسوسة أي حر
ياخ ماني من طينة انتظار
انا من عجينة احساس وفطره وغيره عميا بلا صبر
انا بشكي ليك اللهفه والشوق والحنين
وألم بعادك ياخي وحياة رجعتك ياغالي مر
هسع في داعي عشان رفعتك راية لي كل الخلوق الحايمه
وهطتك مسار الدم تقعد روحي في الخوف والجمر
وانا يا هدي اديتك امان الدنيا وقعت وبصمت عليك رفيق الهجعه ترياق العمر
بيك اكتفيت اسمر حنين زول ولا كل السمر
قسمت للأعماق ملامح ضحكتك.. لون المرور..
عينيك جوازات مرقه شان تقدر تتاوق من محلاتك علي البي الدس بمر
تلعب علي كيفك تبرمج قعدتك في الدم
تقيم الليله في كريات دماي البيضا شان باكر تقيل في الحُمر
حذرت اي درب دخلتبو تاني ما يفتح وراك بيبانو للشايلين بريق الريده
علمت العيون إلاك تقيد شوف زوايا الشوف تغض من أي زول تاني البصر
وانت الحفرت مجاري انفاسك جواي
وفهمت تركيبت عناصر دخلتك
سمعت شيطان الهوي الماليني صوت عينيكا ترنيمة وتر
أها هسي كان نوى إلفضك موج الوداد العاتي في أرض الله بر..
كيفن تفوت من غير إعرفو الناس مروقك
ويات رئه بتديني إحساس اوكسجينك تاني عاد بي يات ممر
إت ما بشر؟
بهواك.. وماراعيت قبل اهواك شروط الريده
ماعديت زوادة الفرقه لي هادا السفر
انا هسي لا آمنت بي بعدك عشان استقبلك من باب قديم الذكري
لا بي إعتقادي القاطع اني بموت عشان القاك عشان أرجاك عشان أنساك كفر
ومدام محل ما أفر بساسق فيكا بين الأوردة الشايلاني لي شريان هواك
الواسع اللاتمنى مافيش إلا من عينيكا ليك وجهه ومفر
