اندهشت الدكتورة جيهان المشرف والدة محمد المعتصم عصام الدين صالح محمد عثمان(الطالب السوداني) الذي ظهر في شهر يونيو وهو يرتدي الزي القومي السوداني كاملاً وسط صورة تخرج جماعية ضمت عشرات الطلاب من جامعة كامبردج ببريطانيا ووجدت الصورة حينها تداولاً واسعاً.
وكان مصدر دهشة الدكتورة جيهان التجاني المشرف بحسب رصد محرر “النيلين”تداول صورة لها على نطاق واسع مكتوب عليها (دي بنت الناطق الرسمي باسم الخارجية ،انضمت لداعش في العراق وسافرت بدون معرفة أسرتها).
فكتبت دكتورة جيهان بحسب “موقع النيلين” رسالة معبرة لما أصابها .
(السلام عليكم و رحمة الله و بركاته
يا أهل الله و ناس بلدي الشرفاء
دا شنو الكلام ده
لا حول ولا قوة الا بالله العلي العظيم
عاد أقول ليكم شنو
دي انا
جيهان التجاني المشرف مختار الشكيري بركات
بنت
دكتور التجاني المشرف
و بروفيسور سامية احمد جمعة
عمري ٤٨ سنة
و مقيمة بره السودان
دا أولاً
ثانياً
جد خفت من الاعلام
والله كنت بصدق اي شي يجي تبع الواتسب
علشان ما بفتكر الناس ممكن تالف لي الدرجة دي
و بنزل اي بوست يجي من الجهة دي
يا لي النقاش
يا لي التعزية
يا لي المجاملة
يا لي الأخبار
يا لي الفرحة
بس حسي امنة انو اي خبر يجي لازم أتأكد منو
مثني و ثلاث و رباع
و الوءمن مصدق
و ياما دخلت في اخطاء مع ناس بي سبب التصديق الاعمي ده
اههههه لحدي ما الله جابو لي انا زاتي
علشان يعلمني درس
و أحمدو و اشكرو علي الدرس ده
علشان ما أخذ زنوب تاني
الله بعلم بي نوايا العباد
هو عالم بي نيتي طوالي
الحمد لله
هههههه
ثالثاً الناطق الرسمي لي وزارة الخارجية
الفيه مكفيهو
لمن كمان تختو ليه صورة ست كبيرة زي دي
و بنتو شابة و جميلة
و زي ما بنقول في السودان
لسي ما دخلت دنيا
يعني ما عرسة لسي صفيرة
و انا خلاص مارقة منها
هههههههه
و هو ممكن جداً يكون من الجيل حقي
و بنتو ممكن تكون فدر أولادي
يعني حرام عليكم
خافو الله
و رابعاً
انا كلو يوم ابوي
الله يطول في عمرو
نافي فيني اتحجبي زي أخواتك
اتحجبي زي أخواتك
و انا كلو يوم طالبة من الله الهداية
علشان مقصرة مع الله في دي شديد
و الله سبحانه و تعالي اصلو ما قصر معاي في شي
ديني ناقص بعدم الحجاب
حسي خوفتوني جد
لو الله هداني و اتحجبت
حتطلعوني زوجة بن لادن
رحمة الله عليه
ما معقولة يا اخوتي
و برضو ادعو لي الله يهديني و مرادي يتم
خامساً
كل يوم انا بهاجم في داعش دي
و لي سنين
لاني ما بفتكر الي بيعملو فيه صحيح
شوهو صورة الاسلام و المسلمين
و بس
و مع ذلك اي انسان مشي داعش حر
و اكيد مقتنع و مافي زول ليه الحق يفتي فيهم
اي
احنا ما عاجبنا لكن هم احرار
و خلقهم الله احرار
و الله يهديهم و يهدينا
و الله يرجعم لي اهلهم سالمين
قولو امين
ما بتمناها لي اي انسان
احساس جد فظيع
لكن أولاً و اخيراً
قدر الله و ما شاء فعل
قولو الحمد لله
و سادساً
يا الناس الطلعو الصورة دي مع الكلام ده في وانساب
حسبي الله نعم الوكيل فيكم
الدنيا رمضان
و انا دعية الله فيكم
عيب
عيب
عيب
و الله يمهل و لا يهمل
و سابعاً و اخيراً
يا السيد المتحدث الرسمي لي وزارة الخارجية
حقيقي أسفة علي السخف ده
و عوارة العالم القاضية دي
و ان شاء الله ترجع ليك بنتك و اولاد كل الناس بي مليون سلامة
و الله داعية ليهم
علشان فيهم اولاد ناس من اعز اصدقاءي
ناس ما باشوف منهم الشينة تب
ناس سودانيين مصابيين بي الأذي من الناس
زي ما كتار مننا مصابين
وارجع وأقول
ان احب الله عبدا ابتلاه
دي بلي و امتحان من الله
و الله يقوينا كلنا
من ظلم الناس
و اتزكرو ان الله ارحم الراحمين
بارك الله في كل من خاف الله
و ألما بخاف الله انا بتوقع منو اي شي
جزاكم الله خير).
الصورة المفبركة عن جيهان المشرف
جيهان
الخرطوم/معتصم السر/النيلين

تعليق بواسطة فيسبوك

التعليقات


مواضيع يمكن ان تنال اعجابك



اترك رد وناقش الاخرين